Thursday 29 August 2013

मनातले काही...

किती चालते, आपल्यामधले अंतर तरीही संपत नाही
किती बोलते, मनातले पण ओठांवरती उमटत नाही

तुला शोधते, ठाऊक जरी तू नाहीस कोठे अवतीभवती
जीव लावते, स्वप्नांवरती कधीच जी की माझी नव्हती

वाट पाहते, घडेल काही, मिळेल सारे हवेहवेसे
रटाळ जगणे, कात टाकुनी बनेल अवचित पुन्हा नवेसे

रात्र एकटी, दिवसा सगळ्यांमध्ये मी एकटीच आहे
आयुष्य माझे, माळ क्षणांची परंतु ती ही सुटीच आहे



Copyright © roopavali. All rights reserved

Sunday 25 August 2013

आताशा मी…

मी काळाच्या धाग्यावरचा छोटासा क्षण
हातून सुटता पुन्हा पकडता येतच नाही

रस्ता लांबत जातो थांबत थांबत जाता
स्वप्नांच्या वाटेवर तुजला नेतच नाही

उगाच हळवे-बिळवे होणे हवे कशाला
भावभावना मनात झिरपू देतच नाही

जो तो ज्याचा त्याचा होतो वेळ आल्यावर
काही आता मी जीवास लावून घेतच नाही



Copyright © roopavali. All rights reserved

Thursday 15 August 2013

हेच प्रेम आहे?

तुझी साथ तुकड्या-तुकड्यांत मी जोडत राहते
नाव तुझे नावाला जोडून खोडत राहते

मन तुझ्याभोवती असण्यासाठी करे विनवण्या
मी कितीकदा पण मन त्याचेही मोडत राहते

आपले नाते जपण्याचे कधी वाटे दडपण
खांद्यांवरती त्याचे ओझे ओढत राहते

पुन्हा पटवते स्वतःलाच 'हेच प्रेम आहे'
पुन्हा एकदा मला नव्याने तोडत राहते


Copyright © roopavali. All rights reserved

Saturday 3 August 2013

मैत्रीदिन

सुखदु:खात माझी साथ देणाऱ्या
मला सावरायला हात देणाऱ्या
मला एकटं पाडणाऱ्या नियतीला
वेळोवेळी मात देणाऱ्या

कधी धीर देत तर कधी रागे भरत
कधी मला गरज असतानाच अवतरत
माझ्या प्रत्येक मूडला सहन करत
इथवर माझ्यासोबत येणाऱ्या

मला प्रत्यक्ष भेटलेल्या, न भेटलेल्या
दूर असून सुद्धा जवळ असलेल्या
माझ्या आयुष्यात हजारो रंग भरत
त्याचा अविभाज्य भाग बनलेल्या… 

माझ्या प्रत्येक मैत्राला मैत्रीदिनाच्या हार्दिक शुभेच्छा!


Copyright © roopavali. All rights reserved